Наурыз мейрамы — ежелгі заманнан қалыптасқан жыл бастау мейрамы. Қазіргі күнтізбе бойынша (наурыздың 22) күн мен түннің теңесуі кезіне келеді. Көне парсы тілінде нава =жаңа + рәзаңһ =күн, «жаңа күн» мағынасында, қазіргі парсы тілінде де сол мағынамен қалған ( но =жаңа + роуз =күн; мағынасы «жаңа күн»), яғни «жаңа жылды» (күн өсуін белгілеуі) білдіреді.
Қазақстан халқының бірлігі күні – Қазақстанда жыл сайын 1 мамырда тойланатын мемлекеттік мереке. Мереке 1996 жылы тойлана бастады. 1995 жылы 18 қазанда Қазақстан Президенті Нұрсұлтан Назарбаев 1 мамырды Қазақстан халқының бірлігі күні деп жариялау туралы жарлыққа қол қойып, сол арқылы Еңбек күнін мерекелеуді алып тастады. Қазақстандағы саяси қайраткерлердің пікірінше, ұлтаралық және конфессияаралық келісімді сақтау саясаттың басым бағыттарының бірі болып табылады.
Халықаралық әйелдер күні – жыл сайын 8 наурызда әлемнің бірқатар елдері мен штаттарында атап өтілетін мереке. Бұл әйелдер құқықтары мен эмансипация үшін күресте әйелдер арасындағы ынтымақтастық күні ретінде пайда болды. 1945 жылы Біріккен Ұлттар Ұйымының Жарғысы ерлер мен әйелдердің теңдігі қағидасын бекіткен алғашқы халықаралық құжат болды. 1975 жылдың наурыз айынан бастап БҰҰ-ға мүше мемлекеттер Халықаралық әйелдер күнін атап өтеді.
