sko-veterinary
«Ауыл шаруашылық жануарларын бірдейлендіру» ақпараттық жүйесінде жануарлардың туған күндерін қалай өзгертуге болады?
Қазақстан Республикасы Ауыл шаруашылығы министрінің 2010 жылғы 2 маусымдағы №367 бұйрығымен бекітілген, ауыл шаруашылық жануарларын бірдейлендіру жөніндегі деректер базасын қалыптастыру және жүргізу, сондай-ақ одан үзінді беру қағидаларының 35-тармағына сәйкес, егер ауыл шаруашылық жануарлары бойынша мәліметтерді өзектендіру (түзету) фактісі сот тәртібімен анықталған жағдайда, қызмет көрсетуші деректер базасындағы жануарлар туралы мәліметтерді сот шешімі негізінде өзектендіруді (түзетуді) жүзеге асырады.
Осыған орай, ауыл шаруашылық жануарларының туған күндерін «АШЖБ» ақпараттық жүйесінде өзектендіру (түзету) тек сот шешімі негізінде жүргізіледі.
Жануарлардан бруцеллезге қан алдыру міндетті ме?
Жануарларды бруцеллезге зерттеу ҚР АШМ 2015 жылғы 29 маусымдағы № 7-1/587 бұйрығымен бекітілген Ветеринариялық (ветеринариялық-санитариялық) қағидаларға сәйкес жоспарлы тәртіппен жүргізіледі. «Ветеринария туралы» ҚР Заңының 25-бабына сәйкес жануарлардың иелері ветеринариялық-санитариялық қауіпсіздікті қамтамасыз ету үшін өз жануарларының уақтылы диагностикасын қамтамасыз етуге міндетті. Бұл аурудың таралуын болдырмау үшін қажет.
Халықтың әлеуметтік жағынан осал топтарына жататын жануарлар иелері үшін иттер мен мысықтарға тегін чип салу қарастырылған ба? Үй жануарларына чип салу үшін қайда жүгінуге болады?
«Жануарларға жауапкершілікпен қарау туралы» Қазақстан Республикасы Заңының 4-бабының 11-тармағына сәйкес иелері халықтың әлеуметтік жағынан осал топтарына жататын үй жануарларын есепке алу үй жануарларын есепке алу қағидаларына сәйкес бюджет қаражаты есебінен жүргізіледі. Петропавл қаласы мен аудандардың ветеринариялық станцияларына жүгіну қажет.
Үй жануары (ит, мысық) жоғалған немесе өлген кезде оларды eGov жүйесінде есептен шығару қалай жүзеге асырылады?
Үй жануарларын есепке алу қағидаларына сәйкес eGov жүйесінде жануарды есептен шығару үй жануарларын есепке алу жүйесінде "үй жануарын белсенсіз ету" оқиғасын тіркеу арқылы жүзеге асырылады. Белсенсіз ету жағдайларына мыналар жатады: үй жануарын жансыздандыру, үй жануарының өлімі, үй жануарының жоғалуы. Тиісті мәліметтерді енгізу үшін иесі тіркеушіге (жеке кәсіпкерге, ветеринариялық қызметті жүзеге асыратын мемлекеттік емес заңды тұлғаға немесе жергілікті атқарушы орган құрған мемлекеттік ветеринариялық ұйымға) жүгінеді. Тіркеуші иесінің өтініші мен растайтын құжаттардың (қажет болған жағдайда) негізінде үй жануарларын есепке алу дерекқорына тиісті оқиғаны енгізеді, содан кейін жануар белсенсіз етіледі және eGov жүйесінде белсенді деп саналмайды.
