Атаулы әлеуметтік көмек алу кімнің құқығы бар?

Кепілдік берілген әлеуметтік топтама шартсыз немесе шартты ақшалай көмек алатындар қатарындағы: бір жастан алты жасқа дейінгі балалары, сондай-ақ орта білім беру ұйымдарында оқуға кіріспеген алты жасқа толған балалары бар табысы аз отбасыларға – атаулы әлеуметтік көмек тағайындау кезеңінде; алты жастан он сегіз жасқа дейінгі балалары, сондай-ақ орта білім беру ұйымдарында білім алатын, он сегіз жасқа толған балалары бар табысы аз отбасыларға тиісті оқу жылы ішінде беріледі. Атаулы әлеуметтік көмек тағайындау үшін жалған мәліметтер және (немесе) анық емес құжаттар ұсыну жағдайларын қоспағанда, шартсыз немесе шартты ақшалай көмекті төлеуді тоқтату отбасыларға кепілдік берілген әлеуметтік топтама беруді тоқтатуға негіз болып табылмайды.

Атаулы әлеуметтік көмек көрсетілуі үшін тұрғылықты жері бойынша – халықты жұмыспен қамту орталығына, ал ауылдық жерлерде кент, ауыл, ауылдық округ әкіміне және «E-gov «Электрондық Үкіметі» веб-порталы арқылы өтінішпен жүгінеді.

Тұрғын үйге кезектілік нөмірін Электрондық үкімет eGov.kz порталында тексеруге болады. Электрондық үкімет порталындағы сервис тұрғын үй кезектілігінің жылжуы туралы деректерді қарауға, сонымен қатар Мемлекеттік тұрғын үй қорынан тұрғын үй алғандардың кезектілік тізімін тексеруге мүмкіндік береді. Ол үшін Электрондық үкімет порталында авторлық тіркелу, ЖСН көрсету және «Мемлекеттік тұрғын үй қорынан тұрғын үй алу кезегін қарау» сервисін таңдау керек.

Тұрғылықты жерінен мекенжай анықтамасын және отбасы құрамы туралы анықтамасын алу үшін жергілікті әкімшілікке қайырылу қажет. Анықтама жеке тұлғаның тіркеуде тұрған елді мекені бойынша беріледі. Мысалы, азамат Қордай ауылында тіркелген, бірақ Қарасу ауылында тұратын болса, онда анықтаманы Қордай ауылдық округі әкімшілігінен алады. Егер жеке тұлғаның тұрғылықты жері мен тіркелген жері бір елді мекенде болса, онда сол округтің әкімшілігінен ала береді. Анықтама алу үшін өзімен бірге жеке куәлік және ағымдағы салық кезеңіне мүлік салығы төленгендігі туралы түбіртек болу қажет. Сонымен қатар, тіркелген мекенжай бойынша жаңадан отбасы мүшесін немесе туысын тіркеуге қойған болса, онда ол азаматтың да жеке басын куәландыратын құжат ( жеке куәлік немесе туу туралы куәлік) болуы қажет.

Мемлекеттік тұрғын үй қорынан тұрғын үй кезегіне тіркелу үшін тиісті құжаттар тізімін аудан әкімдігінің тұрғын үй-коммуналдық шаруашылық, жолаушылар көлігі және жолдары бөлімінен алып, «еgov» порталы арқылы немесе «Азаматтарға арналаған үкімет» мемлекеттік корпорациясы КЕ АҚ Жамбыл облысы бойынша филиалы ХҚКО (Халыққа Қызмет Көрсету Орталығы) арқылы өткізуі қажет. Құжаттары толық, қолданыстағы Қазақстан Республикасының Заң талаптарына қайшы келмеген жағдайда тиісті санатқа (категория) жатқызылып, кезекке (тұрғын үй заң аясында кезекке сәйкес беріледі) алынатын болады.