Мемлекеттік қызметшілер мен бюджеттік ұйымдардың, мемлекеттік кәсіпорындардың қызметкерлері, ғарышкерлікке кандидаттар, ғарышкерлер, мемлекеттік сайланбалы лауазымдарды атқаратын адамдар, егер олар мемлекеттік қызметте, мемлекеттік кәсіпорында немесе бюджеттік ұйымдарда (мемлекеттік сайланбалы лауазымда болу мерзімін қоса алғанда) кемінде он жыл (жиынтығында) жұмыс істеген болса, қызметтік тұрғын үйге теңестірілген тұрғын үйлерді қалдық құны бойынша жекешелендіре алады, сондай-ақ жұмыс мерзіміне қарамастан егер еңбек қатынастары мынадай негіздер бойынша тоқтатылса:
1) ұйымды тарату, жұмысшылар санын немесе штатын қысқарту;
2) одан әрі жұмысқа кедергі келтіретін ауруға байланысты;
3) зейнетке шығуға байланысты.
Ғарыш қызметі саласында он бес жылдан астам жұмыс өтілі бар, ғарышкерлікке кандидаттар, ғарышкерлер тұрғын үйді тегін жекешелендіреді.
Қызметтік тұрғын үйге теңестірілген тұрғын үй берілген қызметкер қайтыс болған жағдайда, жекешелендіру құқығы қайтыс болған (қаза тапқан) адамның жұмыс мерзіміне қарамастан, қайтыс болған (қаза тапқан) адамның отбасы мүшелеріне өтеді.
Мемлекеттік мекемелердің қызметкерлері мен судьялар, Заңда көзделген жағдайларды қоспағанда, егер олар мемлекеттік қызметте, бюджеттік ұйымдарда, мемлекеттік кәсіпорындарда немесе судья лауазымында (мемлекеттік сайланбалы лауазымда болу мерзімін қоса алғанда) кемінде он жыл (жиынтығында) жұмыс істеген болса, өздері тұратын қызметтік тұрғын үйлерді қалдық құны бойынша жекешелендіре алады, сондай-ақ егер еңбек қатынастары мынадай негіздер бойынша тоқтатылса, жұмыс мерзіміне қарамастан:
1) ұйымды тарату, жұмысшылар санын немесе штатын қысқарту;
2) одан әрі жұмысқа кедергі келтіретін ауруға байланысты;
3) зейнетке шығуға байланысты.
Қызметтік тұрғын үй берілген қызметкер қайтыс болған жағдайда, жекешелендіру құқығы қайтыс болған (қаза тапқан) адамның жұмыс мерзіміне қарамастан, қайтыс болған (қаза тапқан) адамның отбасы мүшелеріне өтеді.
Қазақстан Республикасының әлеуметтік қорғау туралы заңнамасына сәйкес жұмыспен қамтуға жәрдемдесудің белсенді шараларына қатысушы ретінде қызметтік тұрғын үйлер берілген Қазақстан Республикасының азаматтары мен қандастар, егер олар қызметтік тұрғын үйде кемінде бес жыл тұрса, өздері тұратын қызметтік тұрғын үйлерді қалдық құны бойынша жекешелендіре алады.
2013 жылғы 1 қаңтарға күнтізбелік есептеуде он жыл және одан да көп әскери қызметте болған әскери қызметшілердің мемлекеттік тұрғын үй қорынан қызметтік тұрғын үйді (жабық және оқшауланған әскери қалашықтарда, шекара бөлімшелерінде және өзге де жабық объектілерде орналасқан тұрғын үйлерді қоспағанда) осы Қағидаларда көзделген шарттарда және тәртіппен жекешелендіруге құқығы бар.
2013 жылғы 1 қаңтарға күнтізбелік есептеуде он бес жыл және одан да көп әскери қызметте болған әскери қызметшілердің күнтізбелік есептеуде жиырма жыл әскери қызметтен кейін қызметтік тұрғын үйді өтеусіз жекешелендіруге құқығы бар.
Күнтізбелік есептеуде он жыл және одан да көп еңбек сіңірген әскери қызметшілер немесе арнаулы мемлекеттік органдардың қызметкерлері, сондай-ақ қызметтегі жағдайының шекті жасына жеткеннен кейін, денсаулық жағдайы бойынша немесе штаттардың қысқаруына байланысты әскери қызметтен немесе арнаулы мемлекеттік органдарда қызметтен босатылған адамдар өздері тұратын, оларға теңестірілген қызметтік тұрғын үйлерді қалдық құны бойынша жекешелендіруге құқылы.
Әскери қызметшілер, арнаулы мемлекеттік органдардың қызметкерлері, сондай-ақ арнаулы мемлекеттік органдарда әскери қызметтен немесе қызметтен қызметте болудың шекті жасына жеткеннен кейін, денсаулық жағдайы бойынша немесе штаттардың қысқаруына байланысты күнтізбелік есептеуде жиырма және одан да көп жыл еңбек сіңірген, қызметтік тұрғынжайларға теңестірілген өздері алып жатқан тұрғын үйлерді тегін жекешелендіруге құқылы.
Әскери қызметтен немесе арнаулы мемлекеттік органдарда қызметтен босатылған, осы тармақтың бірінші және екінші бөліктерінде көрсетілген, қызметтік тұрғынжайға теңестірілген тұрғын үй берілген адам қаза тапқан (қайтыс болған) жағдайда жекешелендіру құқығы қаза тапқан (қайтыс болған) адамның отбасы мүшелеріне өтеді.
