Қазақстан Республикасы Еңбек және халықты әлеуметтік қорғау министрлігімен төтенше жағдай кезеңінде «мүгедектікті және/немесе еңбек ету қабілетінен айырылу дәрежесін белгілеу және/немесе қажетті әлеуметтік қорғау шараларын айқындау» мемлекеттік қызметін сырттай, яғни медициналық-әлеуметтік сараптама бөлімдеріне келмей алу механизмі әзірленді.
Қызмет «Электрондық үкімет» веб-порталында (бұдан әрі – Портал) «Электрондық өтініш» сервисі (бұдан әрі – Сервис) арқылы берілген өтініш негізінде көрсетіледі.
Аталған қызметті Сервис арқылы алуға өтініш берген кезде көрсетілетін қызметті алушы тиісті мемлекеттік көрсетілетін қызмет стандартына (бұдан әрі – Стандарт) сәйкес өтінішті толтырады, сондай-ақ тиісті Стандарттың 9-тармағында көрсетілген құжаттардың сканерленген нұсқаларын қамтитын электрондық файлдарды қоса береді және электрондық цифрлық қолтаңбамен (бұдан әрі – ЭЦҚ) қол қояды.
Көрсетілетін қызметті алушының ЭЦҚ-сы арқылы қол қойылған өтініш Портал арқылы Департаменттің медициналық-әлеуметтік сараптама бөлімінің электрондық құжат айналымы жүйесіне жіберіледі.
Медициналық-әлеуметтік сараптама нәтижесі туралы хабарлама көрсетілетін қызметті алушының ұялы байланыстың абоненттік нөміріне және көрсетілетін қызметті алушының Порталдағы жеке кабинетіне (техникалық мүмкіндік болған жағдайда) sms-хабарлама арқылы жіберіледі не Сервис арқылы келіп түскен өтінішке жауап түрінде жіберіледі.
Сонымен қатар, медициналық-әлеуметтік сараптамаға кезекті куәландыруға төтенше жағдайға байланысты келе алмаған азаматтарға, қайта куәландыру кезінде мүгедектік белгіленген жағдайда, мүгедектік мерзімі өтіп кеткен кезең 2020 жылдың 16 ақпанынан есептелетін болады.
