Табиғи әлеуеті жоғары Қорғалжын ауданы туризмді дамыту мен тұрғындар үшін қолайлы орта қалыптастыру бағытындағы жұмыстарды жүйелі түрде жалғастырып келеді. Ауданның бірегей табиғи ерекшеліктері мен халықаралық деңгейде танылған туристік нысандары өңірдің экономикалық дамуына жаңа мүмкіндіктер ашуда. Бұл туралы брифинг барысында аудан әкімі Алмас Алин мәлімдеді.
Қорғалжын мемлекеттік табиғи қорығы мен Теңіз-Қорғалжын көлдер жүйесі ауданның басты туристік брендтерінің бірі саналады. Жыл сайын бұл өңірге еліміздің әр өңірінен және шетелден келетін туристер саны артып келеді. Табиғи туризмді дамыту жергілікті кәсіпкерліктің дамуына да оң әсерін тигізуде.
Аудан аумағында абаттандыру жұмыстары да қарқынды жүргізілуде. Елді мекендерді көгалдандыру, көшелерді жарықтандыру, қоғамдық кеңістіктерді жаңарту және балаларға арналған ойын алаңдарын салу бағытындағы жұмыстар тұрғындардың өмір сапасын арттыруға бағытталған.
Спорт пен мәдениет салаларын дамыту да назардан тыс қалған жоқ. Бұқаралық спортты дамыту, жастардың бос уақытын тиімді ұйымдастыру және мәдени іс-шараларды өткізу арқылы тұрғындардың қоғамдық белсенділігі артып келеді. Бұл өз кезегінде ауданның әлеуметтік тұрақтылығын нығайтуға ықпал етеді.
«Қорғалжын ауданының туристік әлеуеті өте жоғары. Біз табиғи байлығымызды сақтай отырып, туризмді дамытуға, жаңа қызмет көрсету нысандарын ашуға және тұрғындар үшін жайлы орта қалыптастыруға ерекше көңіл бөліп отырмыз», – деді аудан әкімі Алмас Алин.
Туризм, мәдениет және абаттандыру бағытындағы жұмыстардың нәтижесінде Қорғалжын ауданы өңірдегі тартымды туристік бағыттардың біріне айналып келеді. Бұл аудан экономикасына қосымша серпін беріп, жаңа жұмыс орындарының ашылуына мүмкіндік жасауда.
