Шымкент қаласы әкімдігінің Қалалық жайлы ортаны дамыту басқармасы тарапынан қала аумағын көгалдандыру және экологиялық ахуалды жақсарту мақсатында гүл отырғызу және тал отырғызу жұмыстары жоспарланған. Аталған жұмыстар Желтоқсан көшесі, Бәйдібек би даңғылы, Темірлан тас жолы және Қонаев көшесі бойында кезең-кезеңімен жүзеге асырылатын болады. Жоспарланған іс-шаралар қаланың көркін арттыруға, тұрғындар үшін қолайлы әрі жасыл орта қалыптастыруға бағытталған. Гүлдер мен көшеттерді отырғызу барысында тиісті агротехникалық талаптар сақталып, жасыл желектердің тұрақты күтімі қамтамасыз етіледі. Аталған жұмыстарды жүзеге асыру Шымкент қаласының экологиялық жағдайын жақсартуға, қалалық инфрақұрылымды абаттандыруға және тұрғындардың өмір сүру сапасын арттыруға өз үлесін қосады.