Облыстық мәслихат төрағасы Нұркен Кобжанов облыстық мәслихат депутаттары Қ.Б.Оспанова, А.Ж.Алимжанов, И.В.Жабяк, Г.С.Токсамбаев, Е.Б.Халилин және Денсаулық сақтау басқармасының басшысы С.Е.Кенжебаевпен бірге «Қарағанды қаласының №2 көпбейінді ауруханасы» КМК кардиоорталығында болды.
Аурухана басшысы Е.Ш.Нұрлыбаев депутаттарға өңірдегі кардиологиялық қызметтің дамуы, қанайналым жүйесі ауруларын диагностикалау мен емдеудің заманауи жоғары технологиялық әдістерін енгізу, қол жеткізілген нәтижелер және кардиологиялық бейіндегі пациенттерге көрсетілетін медициналық көмекті одан әрі жетілдіру перспективалары туралы ақпарат ұсынды.
Кездесу барысында облыс тұрғындары үшін жоғары технологиялық медициналық көмектің қолжетімділігі мәселелеріне ерекше назар аударылды. Соңғы екі жылда өлім-жітім көрсеткіштерінің төмендегеніне қарамастан, қанайналым жүйесі ауруларымен сырқаттанушылықтың өсу үрдісі сақталып отырғаны атап өтілді. Бұл көрсеткіш халықтың 100 мың адамына шаққанда шамамен 70 жағдайды құрайды. Сондай-ақ мамандандырылған ем алу үшін пациенттердің Астана мен Алматы қалаларындағы жетекші медициналық орталықтарға кетуі мәселесі өзектілігін жоғалтпағаны айтылды.
Кездесу аясында кардиоорталықты 2028 жылға дейін дамытудың өңірлік бағдарламасы таныстырылды. Оның шеңберінде стационарлық корпусты күрделі жөндеуден өткізу, жобалық-сметалық құжаттаманы аурухананың өз қаражаты есебінен әзірлеу, заманауи рентген-операциялық блок салу, материалдық-техникалық базаны жаңғырту, сондай-ақ госпитальдық фармация бөлімшесін құру міндеттері белгіленді.
Сонымен қатар «Бірыңғай цифрлық госпиталь» қағидаттарына негізделген облыстық көпбейінді кардиоорталық құру жобасы ұсынылды. Жоба алғашқы медициналық-санитариялық көмек ұйымдарын, телемедицина қызметін және облыс аудандарындағы стационарларды пациенттерді бағыттаудың бірыңғай жүйесіне біріктіруді көздейді. Бұл тәуекелдерді ерте анықтауға, пациенттерді жоғары технологиялық емдеуге уақтылы жіберуге және өңірдің кардиологиялық қызметінің мүмкіндіктерін едәуір кеңейтуге мүмкіндік береді.
Сапар қорытындысы бойынша кардиологиялық қызметті одан әрі дамытуға бағытталған ұсыныстар мен бастамалар облыстық мәслихаттың бейінді комиссияларының отырыстарында қаралатын болады.
