Елена Николаевна Гулинаның кәсіби қызметі отыз бес жылдан астам уақыт бойы халықтың санитариялық-эпидемиологиялық саламаттылығын қамтамасыз етумен тығыз байланысты. Осы жылдар ішінде ол санитариялық-эпидемиологиялық қызметтің дамуына және Павлодар облысының қоғамдық денсаулық сақтау жүйесін нығайтуға елеулі үлес қосты.
Елена Николаевнаның еңбек жолы 1985 жылы Чарджоу медициналық училищесін «санитариялық фельдшер» мамандығы бойынша тәмамдағаннан кейін басталды. Мамандығы бойынша алғашқы еңбек қадамын ол Түрікменстанның санитариялық-эпидемиологиялық қызметінде санитариялық дәрігердің көмекшісі болып жұмыс істеуден бастады. Бір жылдан кейін оның еңбек жолы Павлодар облысында жалғасып, бұл өңір оның ұзақ жылдар бойғы жемісті қызметінің мекеніне айналды.
Ермак қаласының (қазіргі Ақсу қаласы) санитариялық-эпидемиологиялық мекемелерінде еңбек ете жүріп, Елена Николаевна қызметтің түрлі бағыттарын меңгерді. Санитариялық дәрігердің көмекшісі, медициналық статистик және эпидемиологтың көмекшісі ретінде жұмыс істеуі оған берік кәсіби негіз қалыптастырып, мол тәжірибе жинақтауға мүмкіндік берді.
2004 жылдан бастап мемлекеттік қызметші болып табылады. Қазіргі уақытта Елена Николаевна Ақсу қалалық санитариялық-эпидемиологиялық бақылау басқармасының санитариялық-гигиеналық бақылау және техникалық регламенттер талаптарының сақталуын бақылау бөлімінің бас маманы қызметін атқарады. Ол жоғары кәсібилігімен, жауапкершілігімен, принципшілдігімен және өз ісіне ұқыпты көзқарасымен ерекшеленеді.
Елена Николаевнаның еңбегі түрлі деңгейде бірнеше рет жоғары бағаланды. Ақсу қаласының дамуына қосқан үлесі мен көп жылғы адал еңбегі үшін оның фотосуреті қалалық Еңбек даңқы тақтасына орналастырылды. Ол Қазақстан Республикасы Денсаулық сақтау вице-министрінің Құрмет грамотасымен, Павлодар облысы әкімінің және Ақсу қаласы әкімінің Құрмет грамоталарымен марапатталған.
Әріптестері Елена Николаевнаны бай кәсіби тәжірибесі, адамгершілігі, әрдайым көмек көрсетуге дайын тұратыны және таңдаған ісіне адалдығы үшін жоғары бағалайды.
