Қазақстан Республикасында қызметкер еңбек (қызметтік) міндеттерін атқару кезінде жазатайым оқиғалардан міндетті сақтандыру жүйесі 2005 жылдан бастап қолданылады. Қолданыстағы заңнамаға сәйкес әрбір жұмыс беруші өз қызметкерлерін міндетті сақтандыру шартын жасасуға міндетті.
Аталған талаптың енгізілгеніне 20 жылдан астам уақыт өтсе де, бүгінгі күні бұл міндетті орындаудан жалтаратын жұмыс берушілер әлі де кездеседі, бұл өз кезегінде заңнама талаптарының бұзылуы болып табылады.
Қызметкерлерді жазатайым оқиғалардан міндетті сақтандыру – заңды тұлғалар мен жеке кәсіпкерлердің қызметкерлерін еңбек (қызметтік) міндеттерін орындау кезінде орын алған жазатайым оқиғалардың салдарынан қорғауды қамтамасыз ететін сақтандыру шартын жасасуы болып табылады.
Сақтандырудың бұл түрі міндетті болып табылады және қызметкердің еңбек (қызметтік) міндеттерін орындауына байланысты орын алған жағдайларға қолданылады. Сақтандыру жағдайы туындаған кезде зардап шеккен қызметкерге немесе оның заңды өкілдеріне заңнамада және сақтандыру шартында көзделген тәртіппен және мөлшерде сақтандыру төлемдері жүзеге асырылады.
Жазатайым оқиға деп адамның еркінен тыс, сыртқы механикалық, электрлік, химиялық, термиялық немесе өзге де әсерлердің нәтижесінде кенеттен орын алып, қызметкердің денсаулығына зиян келтіруге, жарақат алуына немесе қайтыс болуына әкеп соққан және оның еңбек (қызметтік) міндеттерін орындауымен байланысты оқиға түсініледі.
Жұмыс берушінің қызметкерлерді міндетті сақтандыру шартын жасасудан жалтаруы әкімшілік жауаптылыққа әкеп соғады. Бұл құқық бұзушылық үшін Қазақстан Республикасының заңнамасында кәсіпкерлік субъектісінің санатына қарай мөлшері 1 000 айлық есептік көрсеткішке (АЕК) дейін жететін әкімшілік айыппұл көзделген.
