Қарақия ауданы әкімі аппаратының ұйымдастыруымен Сенек, Бостан, Құланды ауылдарында азаматтарға мемлекеттік қызметтерді алу құқықтары мен мүмкіндіктері туралы, халықтың хабардар болу деңгейін арттыру мақсатында мемлекеттік қызмет көрсету мәселелеріне қатысты түсіндіру іс-шарасы өткізілді.
Бұл шараның негізгі мақсаты-шалғай елді мекендердегі азаматтарға мемлекеттік қызметтерді алудың құқықтық негіздері мен заманауи мүмкіндіктерін кеңінен таныстыру, сол арқылы халықтың құқықтық және цифрлық хабардар болу деңгейін сапалы жаңа сатыға көтеру болып табылады. Тұрғындармен тікелей диалог форматында ұйымдастырылған кездесулер барысында күнделікті өмірде жиі кездесетін өзекті мәселелер, атап айтқанда, жер қатынастары, әлеуметтік қорғау, ауыл шаруашылығы, спорт пен дене шынықтыру салаларындағы мемлекеттік қызмет түрлері жан-жақты талқыланды. Сонымен қатар, ауылдық жерлерді білікті мамандармен қамтамасыз етуде стратегиялық маңызы зор «Дипломмен ауылға» мемлекеттік бағдарламасының басымдықтары мен оған қатысу алгоритмдері бойынша тұрғындарға нақты құқықтық кеңестер берілді. Сала мамандары қызмет алудың тиімді әрі қысқа жолдарын түсіндіріп, әрбір азаматтың сұрақтарына тұшымды жауап қайтарды. Аталған бұл іс-шара салалар бойынша көрсетілетін мемлекеттік қызметтердің сапасы мен ашықтығын арттыруға, бюрократиялық кедергілерді жоюға және қызмет алушылардың заңды құқықтарын қорғауға бағытталған жүйелі қадамдардың бірі ретінде өз нәтижесін көрсетті. Осындай кездесулер мемлекет пен қоғам арасындағы сенім көпірін бекіте түсетіні анық.
Қарақия ауданы әкімдігінің баспасөз қызметі
