Жасыбай, Сабындыкөл және Торайғыр көлдерінде туристік маусымның ресми ашылуы қарсаңында Павлодар облысының полициясы қауіпсіздік шараларын күшейтуде. Осыған байланысты Павлодар облысы полиция департаменті бастығының орынбасары Малик Оңғарбаевтың төрағалығымен Баянауыл ауданында жұмыс кеңесі өтті.
Жиынға Баянауыл ауданының әкімі, Торайғыр ауылдық округінің әкімі, әкімшілік полиция мен қоғамдық қауіпсіздік қызметтерінің басшылары, уәкілетті мемлекеттік органдардың өкілдері және демалыс аймақтарының иелері қатысты. Кездесу барысында жазғы туристік кезеңде құқық бұзушылықтардың алдын алу, қоғамдық тәртіпті сақтау және азаматтардың қауіпсіздігін қамтамасыз ету мәселелері жан-жақты талқыланды.
Полиция өкілдерінің айтуынша, бірлескен жұмыстың негізгі мақсаты – қоғамдық тәртіп пен жол қауіпсіздігіне қатысты кез келген құқық бұзушылықтың алдын алып, олардың жолын дер кезінде кесу.
Кеңес барысында балалардың қоғамдық орындардағы және су айдындарындағы қауіпсіздігіне ерекше назар аударылды. Бақылау тек ресми жабдықталған жағажайларда ғана емес, судағы жазатайым оқиғалар қаупі жоғары рұқсат етілмеген демалыс орындарында да күшейтілетіні атап өтілді.
Полиция, жергілікті атқарушы органдар және кәсіпкерлік субъектілері арасындағы үйлесімді өзара іс-қимылдың нәтижесінде өңір тұрғындары мен қонақтары үшін жазғы демалысты қауіпсіз әрі жайлы өткізуге барлық қажетті жағдай жасалмақ.
