Қазақстанда дәстүрлі медицина саласында медициналық көмек көрсету стандарты бекітілді. Қазақстан Республикасы Денсаулық сақтау министрлігінің 2026 жылғы 19 мамырдағы бұйрығымен мамандардың жұмыс қағидалары, көрсетілетін қызметтер тізбесі және ұйымдарға қойылатын талаптар айқындалды. Құжат 2026 жылғы 5 маусымнан бастап қолданысқа енгізілді.
Қызметті кімдер көрсете аладыДәстүрлі медицина әдістерімен медициналық қызметтерді меншік нысанына және ведомстволық бағыныстылығына қарамастан денсаулық сақтау субъектілері көрсете алады.
Міндетті талаптардың бірі – «Дәстүрлі медицина» кіші түрлері бойынша медициналық қызметке лицензияның болуы. Қызмет Қазақстан Республикасының «Рұқсаттар және хабарламалар туралы» Заңына және денсаулық сақтау объектілеріне арналған санитариялық қағидаларға сәйкес жүзеге асырылады.
Қызметтерді жоғары медициналық білімі және (немесе) келесі бағыттар бойынша көпбейінді мамандануы бар мамандар көрсете алады:
• рефлексотерапия;
• мануалды терапия;
• су-джок терапиясы;
• гомеопатия;
• гирудотерапия;
• фитотерапия.
Сонымен қатар, мамандардың дәстүрлі медицина бойынша тиісті сертификаты болуы тиіс. Практикалық қызметті жүзеге асыратын медицина қызметкерлері міндетті және мерзімдік медициналық тексеруден өтуі қажет.
Қызмет қай жерде көрсетіледіДәстүрлі медицина әдістерімен медициналық көмек ақылы негізде:
• амбулаториялық-емханалық ұйымдарда;
• стационарды алмастыратын және стационарлық жағдайларда;
• санаторийлік-курорттық ұйымдарда көрсетіледі.
Пациенттер көрсетілімдер болған және қарсы көрсетілімдер болмаған жағдайда дәстүрлі медицина маманына жіберіледі. Процедуралар алдында пациент ақпараттандырылған келісімге қол қоюы тиіс.
Емдеу клиникалық хаттамалар мен санитариялық-эпидемиологиялық талаптарға сәйкес жүргізілуі қажет. Атап айтқанда:
• стерильді шығыс материалдарын пайдалану;
• медициналық қалдықтарды жинау, залалсыздандыру және сақтау тәртібін сақтау;
• қауіпсіздік стандарттарын сақтау;
• асқынулардың алдын алу.
Мамандар медициналық құжаттаманы жүргізуге және мәліметтерді медициналық ақпараттық жүйеге енгізуге міндетті.
Егер пациент дәлелді медицина әдістерінен бас тартса, құжатта міндетті консилиум өткізу және пациенттің жазбаша ақпараттандырылған бас тартуын рәсімдеу көзделген.
