«Ақтөбе облысының жастар саясаты мәселелері басқармасы» мемлекеттік мекемесі, Ақтөбе облысы аумағындағы мемлекеттік жастар саясатын жүзеге асыру саласында басшылықты жүзеге асыратын Қазақстан Республикасының мемлекеттік органы болып табылады.Мекеменің миссиясы облыста жастар мен жастар ұйымдарының бастамаларын қолдау, жастардың шығармашылық, рухани және физикалық мүмкіншіліктерін дамыту, жастар арасында азаматтық-құқықтық, мәдени адамгершілік тәрбие беру және салауатты өмір салтының берік машықтарын қалыптастыруға бағытталған мемлекеттік саясатты жүргізу болып табылады.
Мекеменің негізгі міндеттері:
1) жастардың құқықтары мен заңды мүдделерін қорғау;
2) жастарды елдің әлеуметтік-экономикалық және қоғамдық-саяси өміріне тарту;
3) азаматтыққа тәрбиелеу және қазақстандық патриотизм сезімін нығайту;
4) Ақтөбе облысы аумағында Қазақстан Республикасының мемлекеттік жастар саясатын іске асыру;
5) мәдениет және дін диалогының жаңа нысандарын іздеу жолы арқылы жастар саясаты саласында ішкі саяси тұрақтылықты және этносаралық келісімді одан әрі нығайту;
6) жастар арасында сыбайлас жемқорлыққа қарсы мәдениетті қалыптастыру, құқықтық мәдениет деңгейін арттыру, сыбайлас жемқорлық көріністеріне төзбеушілікке тәрбиелеу;
7) жастар арасында салауатты өмір салтына берік дағдысын қалыптастыру, азаматтық-құқықтық және адамгершілік мәдениетке тәрбиелеу;
8) мемлекеттік жастар саясатын іске асыру бойынша ақпараттық - насихаттау және түсіндіру жұмысын ұйымдастыру;
9) жастар саясаты саласында жергілікті мемлекеттік органдардың қызметіне жәрдемдесу;
10) жастар ұйымдарымен, партиялардың жастар қанаттарымен және этномәдени бірлестіктермен өзара іс-қимылын жүзеге асыру.
Жастар бос уақытын тиімді өткізу үшін қаламызда қандай орындар бар?
Қаламызда жастар бос уақытын тиімді өткізіп, өзара тәжірибе алмаса алатын бірнеше коворкинг орталығы бар.Олар Қалалық Жастар ресурстық орталығында,Қ.Жұбанов университетінде,С. Жиенбаев атындағы кітапханасында, «Қоғамдық келісім» КММ-де,IT Hub –та коворкинг орталықтары бар.
«Дипломмен ауылға!» бағдарламасы арқылы ауылға қалай жұмысқа тұруға болады.
Бағдарламаға ауылдық жерлерде өмір сүру үшін және бірқатар мамандықтар бойынша жұмыс істеу үшін келген қазақстандықтар қатыса алады. Бұл денсаулық сақтау, білім беру, әлеуметтік қамсыздандыру, мәдениет, спорт, агроөнеркәсіптік кешен саласындағы қажетті мамандықтар тізбесіне сәйкес мамандар, ауылдар, кенттер, ауылдық округтер әкімдері аппараттарының мемлекеттік қызметшілері Жобаға қатысушыларға мынадай әлеуметтік қолдау шарасы ұсынылады: • 100 АЕК мөлшерінде біржолғы көтерме жәрдемақы; * тұрғын үй сатып алуға немесе салуға аудан орталығында 2 500 АЕК, ауылдық елді мекенде 2 000 АЕК бюджеттік кредит бөлінеді. Кредит 15 жылға беріледі. Міндетті шарт - ауылдық жерде кемінде үш жыл жұмыс істеу.
Мен студентпін, жазғы уақытта уақытша жұмыс жасап, қаражат тапқым келеді. Жастарға қандай жұмыс бар?
Жазғы мезгілде «Жасыл ел» жобасы арқылы уақытша жұмысқа тұруға болады. Жалақысы 160-180 мың теңге көлемінде. Ақтөбе қаласы Әйтеке би көшесі 39 ғимаратында «Жасыл ел» штабы орналасқан.
Мен жұмыс жасаймын, отбасылымын. Бірақ жеке үйім жоқ. Сіздің басқарма арқылы жас мамандараға тұрғын үймен көмек бола ма?
Ақтөбе облысының жастары мен жас отбасыларын қол жетімді баспанамен қамтамасыз ету мақсатында «Ақтөбе жастары» тұрғын үй бағдарламасы қабылданып, жүзеге асырылып келеді. 2023 жылы 42 жас, 2024 жылы 67 жас баспаналы болды. Жалпы 2023-2024 жылдары «Ақтөбе жастары» тұрғын үй бағдарламасы қолжетімді тұрғын үймен қамтамасыз ету және жас отбасыларды қолдау бағытында оң нәтижесін көрсетті. Осыған байланысты, 2025 «Ақтөбе жастары» тұрғын үй бағдарламасы III кезеңін жүзеге асыру жоспарлануда. Қазіргі таңда, қаржылық – экономикалық негіздемеге ведомстводан тыс сараптама жүргізу сатысында.
Жастарды қолдауға арналған қандай гранттар бар?
«Білім және ғылым», «мәдениет және өнер», «бизнес және кәсіп», «медиа», «ақпараттық технологиялар» және «волонтерлік» салаларындағы жастар бастамаларын қолдауға бағытталған «Тәуелсіздік ұрпақтары» гранты жобасы жүзеге асырылады. Жоба арқылы 3 млн. теңгеге дейінгі көлемде 10 қайтарымсыз грант беріледі (2025 жылға 30 млн.тг. қарастырылды).
